分類新聞

社會新聞

三義慢城2024八月半-禾打扮中秋晚會！

2024-09-11

社會組

[記者陳虹蘊/苗栗報導]

「2024八月半-禾打扮中秋晚會」定於113年9月16日(拜一)臨暗頭到三義鄉公所前廣場盛大舉辦！為慶祝一年一度个中秋佳節，三義鄉公所有特別規劃客家歌舞系列表演摎摸彩活動，營造八月半月圓人團圓、歡樂个節慶氛圍，承蒙苗栗縣政府、台灣中油股份有限公司、三義鄉農會等單位个贊助，摎活動奠定良好个基礎，邀請大家共同感受國際慢城三義个文化魅力。
三義鄉長呂明忠表示，八月半係闔家團圓个大日子，中秋晚會係凝聚鄉親个向心力，現場除了邀請氣球天使-家家、建中國小客家歌謠班、客演舞集、奧斯汀樂團，台語歌王(辦桌)-陳隨意、東東樂團(金曲天團)-等超級个唱將帶來高水準个演出，加上萬眾矚目个全民瘋摸彩，有電視機、冰箱、洗衣機等當多个好禮等著大家分參與觀眾試手氣，共同見證總價值超過15萬銀豐富彩禮獎項，千萬毋好錯過！
三義鄉係客家委員會公告个客家文化重點發展區，有傳統客家聚落，鄉內个客家人口約佔84%，長期配合中央部會同地方政府推動客語政策，在語言文化傳承推廣方面緊創佳績，「106-107年度促進地方客語整體發展計畫」獲得乙組佳等108-111年度「推動客語為通行語成效評核」連續四年榮獲優等，112年度更上一層樓突破自家，榮獲「特優」殊榮，展現出在地堅強个客家民族性同強大个發展潛力。鼓勵公所同仁報考客語能力認證，期望用領頭羊个角色帶頭參與，發揮示範作用，落力煞猛推廣客家文化傳承工作。
為著愛分活動順利舉行，三義鄉公所盡地主情誼，戮力同心辦理，歡迎！歡迎！歡迎三義鄉親朋友共下來鬥鬧熱，藉由參與節慶活動，深入認識三義在地客家文化个內涵，感受觀光產業个深度與質感。